கோஹ்லியை முந்திய சிந்து

கூகுள்' தளத்தில் தேடப்பட்ட இந்திய விளையாட்டு நட்சத்திரங்கள் பட்டியலில் கோஹ்லி, தோனியை முந்தி பாட்மின்டன் வீராங்கனை சிந்து முதலிடம் பிடித்தார்.

இந்திய பாட்மின்டன் நட்சத்திரம் சிந்து, 21. கடந்த ரியோ ஒலிம்பிக் ஒற்றையர் பிரிவில் வெள்ளி வென்று அசத்தினார். சமீபத்திய சீன மற்றும் ஹாங்காங் ஓபனில் பட்டம் வென்றார். இந்நிலையில், 'கூகுளில்' தேடப்படும் இந்திய விளையாட்டு நட்சத்திரங்கள் பட்டியலில் முதலிடம் பிடித்துள்ளார். இதன் மூலம், இந்திய கிரிக்கெட் வீரர்களான தோனி, கோஹ்லியை முந்தினார். தவிர, முன்னாள் வீரர் சச்சினையும் பின்தள்ளினார். இவர்களைத்தவிர, 'டாப்-10' பட்டியலில் ரியோ ஒலிம்பிக்கில் வெண்கலம் வென்ற மல்யுத்த வீராங்கனை சாக்சி மற்றும் தீபா கர்மாகர் (ஜிம்னாஸ்டிக்ஸ்), சானியா (டென்னிஸ்) உள்ளிட்டோரும் இடம்பிடித்துள்ளனர்.